बुरू भितिर आतु किताकोचा सेटेर एनाय पोटका विधायक संजीव सरदार

बुरू भितिर आतु किताकोचा सेटेर एनाय पोटका विधायक संजीव सरदार 

झरना दा: ञु तुलूज विधायक संजीव सरदा

पोटका:- विधायक संजीव सरदार दो 15 किलोमीटर सांगिञ बाईक ते आर ओंडे खोन ताड़ाम काते डुमरिया प्रखण्ड, केंदुआ पंचायत रेया: जंगल ब्लॉक किताकोचा आतुय सेटेर एना आर जनता दरबार ए सापड़ाव के आ ।अडी गे हाहाड़ा रेया: काथा जे दिशोम फुरगल काते 75 बोछोर तायोम पुयलू बार मेतटां विधायक नोङकान सांगिञ आतु ते सेटेर एनाय । पुयलू बार विधायक ञेल काते आतु होड़ा: मोने रे विकास रेया: आँस एभेन एना । निया माड़ां दो ओकोय हों जनप्रतिनिधि नोवा आतु आतु बाको सेटेर आकाना । आतु रे सड़क, बिजली, ञु दा:, नेटवर्क आर दोरकार रेया: सुविधा नोडे चेद हों गे बानु: आ । प्रखण्ड विकास पदाधिकारी साधुचरण देवगम, जोतो विभाग रिन पदाधिकारी आर पंचायत प्रतिनिधि को सेलेद एना । विधायक दो आतु होड़ा: काथा कोय आजोम के आ । इना तायोम आतु होड़ ताला रे मुसारी, वन पट्टा एमान को हाटिञ के आ । माझी बाबा सुधीर सरदार साँव आतु होड़ दो आकोवा: समस्या को लाई सोदोर के आ । आतु होड़ को मेन के आ जे डुमरिया प्रखण्ड खोन नोवा आतु सेटेरो: लागिद सड़क गे बानु: आ । प्रखण्ड कार्यालय सेनो: लागिद पोटका प्रखण्ड होर सेद ते 50 किलोमीटर सांगिञ लागा आ । आर बां खान बुरू पारोम काते 20 किलोमीटर ताड़ाम होर ते प्रखण्ड मुख्यालय सेटेर हुयू: आ । आतु होड़ दो विधायक ठेन सड़क बेनाव रेया: को नेहोर आसदास के आ । किताकोचा आतु रे नल गे बानु: आ। ञु दा: लागिद आधा किलोमीटर सागिञ बुरू झरना रेया: दा: ञु रे मजबूर मेना: कोवा । नितार हों आतु रे बिजली बानु: ते डिबा जुर रे गे को ताहेन काना । नेटवर्क हों बानु: ते ओकोय साला: हों बाको सम्पर्क दाड़ेया: काना । पोल बानु: दाराय ते जापुद दिन दो दा: पेरेजो: आ ओनाते गिदरा स्कूल हों बाको चालाव दाड़ेया: आ । विधायक दो समस्या कोय बाडाय केत ते आतु होड़ आसाय एमात कोवा जे लोगोन गे नोवा सड़क बेनाव रेया: कामी चेतान खोन पास ओचो हुयू: आ । विधायक दो ओड़ा:-ओड़ा: होंय दाड़ाँ के आ आर झरना दा: होंय ञु के आ । नोवा ओक्तो रे विधायक साँव प्रमुख गंगामनी हाँसदा, मुखिया फूलमनी मुर्मू, बीस सूत्री अध्यक्ष भगत बास्के, झामुमो पोटका प्रखण्ड अध्यक्ष सुधीर सोरेन, जयपाल सिंह मुर्मू, भगत हाँसदा साँवते विद्युत, पेयजल, आपूर्ति आर विभाग रिन पदाधिकारी को सेलेद लेना ।

जनता दरबार रे आतु होड़ा: समस्या आजोम तुलूज विधायक संजीव सरदार